ភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ប្រកាសបើកសវនាការជំនុំជម្រះលើបណ្តឹងសុំបដិសេធបញ្ជីបេក្ខជនគណបក្សនយោបាយរបស់គណបក្សភ្លើងទៀននៅថ្ងៃទី២២ ខែមីនា ឆ្នាំ២០២២នេះ។

តាមសេចក្ដីជូនដំណឹងរបស់គ.ជ.ប នៅថ្ងៃទី២១ ខែមីនា ឆ្នាំ២០២២នេះ បានឲ្យដឹងថា សវនាការជាសាធារណៈនឹងធ្វើនាថ្ងៃទី២២ ខែមីនា វេលាម៉ោង ៩:០០នាទីព្រឹក នៅទីស្តីការ គ.ជ.ប ដើម្បីជំនុំជម្រះលើបណ្តឹង/សំណុំរឿងលេខ ០៥១ ចុះថ្ងៃទី១៩ ខែមីនា ឆ្នាំ២០២២។

ក្នុងសវនាការនៅព្រឹកស្អែកនេះ រួមមានសមាសភាពក្រុមប្រឹក្សាជំនុំជម្រះមាន ប្រធាន គ.ជ.ប លោក ប្រាជ្ញ ចន្ទ អនុប្រធាន គ.ជ.ប លោក នុត សុខុម និងសមាជិក គ.ជ.ប ចំនួន ៧រូបទៀត ជាសមាជិកក្រុមប្រឹក្សាជំនុំជម្រះ។

សេចក្ដីជូនដំណឹងបានបញ្ជាក់ថា ពាក្យបណ្តឹងខាងលើនេះ មានកម្មវត្ថុប្ដឹងសុំបដិសេធបញ្ជីបេក្ខជន គណបក្សនយោបាយរបស់គណបក្សភ្លើងទៀន នៃសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ដែលមានដើមបណ្តឹងឈ្មោះ ម៉ៅ មុនី ហើយដែលបានប្រគល់សិទ្ធិជូន លោកមេធាវីឈោ្មះ ទៀង វុទ្ធា ជាសមាជិកគណៈមេធាវីនៃព្រះរាជាណាចក្រកម្ពុជា៕